Lalampahan ka Gunung Pangrango

Mandalawangi mangrupa savana édelwis anu aya di Gunung Pangrango. Savana nu diapit ku dua pasir ieu, sacara administratif asup ka Kabupatén Bogor, Kabupatén Sukabumi jeung Kabupatén Cianjur.

            Tiris, tangtu kesan nu mimiti pikeun kuring basa kaluar tina beus Garuda Pribumi jurusan Bandung-Merak. Turun pas di daérah Cipanas, pertigaan anu rék ka Cibodas. Peuting nu simpé, da geuning nalika nempo arloji téh geus jam 11 peuting. Angkot nu biasa aya di éta pertigaan, ari peuting mah euweuh hiji-hiji acan. Untungna wéh aya babaturan kuring anu geus nepi ka warung Bu Dé, tempat mondok kuring jeung babaturan nu rék naék isukan. Satengah jam nungguan di éta pertigaan, ahirna datang ogé nu ngajemput kuring téh. Tuluy kuring naék motor bari mawa ransel nu geus pinuh ku barang-barang pikeun naék gunung. Nalika kuring nepi warung Bu Dé, langsung wéh sasalaman jeung babaturan kuring nu séjénna bari tuluy léos ka jamban, tuluy istirahat sangkan isukan lalampahan, kaayaan awak geus siap.

            Balébat datang mawa béja, yén ayeuna panon poé geus bijil ti beulah wétan, jadi tanda yén kuring jeung barudak nu séjén kudu buru-buru ngepak deui barang-barang nu rék dibawa lalampahan, sabada solat subuh berjamaah. Bérés ngepak, tuluy kuring saparakanca sarapan pikeun ngeusi tanaga. Jam dalapan, nangtung nguriling ngawangun lingkaran pikeun ngadua ka nu Maha Kawasa, mugia lalampahan kuring jeung tim ayeuna aya dina panangtayungan Pangéran nu Maha Kawasa.

            Lalampahan dimimitian. Tempat anu jadi tujuan kahiji nya éta Bascamp Cibodas, tempat administrasi sareng perijinan pendakian Taman Nasional Gunung Gedé Pangrango (TNGGP). Cukup ku perwakilan tim anu nguruskeun  ieu perijinan, da saméméhna gé geus boking heula ngaliwatan website TNGGP kucara online. Ayeuna mah ukur nyaluyukeun jalma nu ngilu lalampahan nalika daptar online jeung nu ngilu ayeuna. Lima belas menit cukup pikeun nguruskeun  perijinan didieu, haté leuwih tenang da geus terdaptar,bisi wéh aya nanaon di luhur téh.

            Léngkah tuluy nepi ka pos Talaga Biru. Dingaranan Talaga Biru téh ku sabab talaga anu aya di éta tempat warnana biru, kusabab pinuh ku alga-alga anu ngajadikeun éta cai jiga biru. Teu lila  eureun didinya, da jalan pikeun nepi ka Mandalawangi téh masih jauh kénéh. Ti Talaga Biru, tuluy kuring jeung réngréngan nepi ka pos 3 anu ngaranna Panyangcangan. Cenah, ieu pos disebut panyangcangan téh kusabab baheulana ieu tempat mangrupa tempat nyancang kudana Prabu Suryakencana nalika rék ka Alun- Alun Suryakencana, lembah édelwis di Gunung Gedé. Teu jauh ti Panyangcangan, ka jalan turunan beulah katuhu aya curug ngaréndéng nu ngaranna Curug Cibeureum. Tapi pikeun ka Madalawangi mah, teu kaliwatan éta curug téh, da béda jalan téa.  Arah nu dituju nya éta ka katuhu jalan, nu geus mimiti nanjak nepi ka nyieun ngos-ngosan kana napas téh. Jarak ti Panyangcangan nepi ka Cipanas lumayan jauh.

            Cipanas mangrupa pos anu kaopat diliwatan ku tim nu lalampahan. Disebut Cipanas sabab jalur nu diliwatan mangrupa walungan leutik anu caina panas, beulah kénca curug-curug leutik cai panas, beulah katuhuna jurang. Jadi upama ngaliwatan ieu jalan kudu ati-ati, sanajan geus dipager beusi beulah katuhuna. Sabada ti Cipanas, lalampahan dilanjutkeun ka pos Kandang Batu. Kandang Batu ieu aya di ketinggian 2220 mdpl, disebut Kandang Batu kusabab di ieu tempat loba matérial batu sésa meletusna Gunung Gedé. Ti ieu pos, jalan leuwih nanjak tibatan saméméhna, perlu waktu 1 jam pikeun nepi ka pos terahir saméméh puncak Gunung Pangrango.

            Pos terahir nu diliwatan nya éta pos Kandang Badak. Dingaranan Kandang Badak kusabab daérah ieu bécék nepi ka jiga kandang. Di pos ieu, aya persimpangan jalur, kénca jalur pikeun ka Gunung Gedé, katuhu pikeun ka puncak Gunung Pangrango. Diperlukeun waktu 3-4 jam pikeun nepi ka puncak Gunung Pangrango.

            Puncak Pangrango mangrupa dataran pangluhurna di TNGGP, leuwih hieum tibatan Gunung Gedé sabab jarang nu lalampahan ka Pangrango mah, seseringna naraékna ka Gedé. Ti puncak ieu tangtuna urang bisa nempo Alun–Alun Mandalawangi tur bisa nempo kelap kelip lampu Kota Jakarta. Tiris tangtuna waé hal anu pasti urang rasakeun. Naging nalika turun ti puncak tur nepi ka Alun-Alun Mandalawangi, rasa capé asa leungit. Béntang baranang, kembang abdi, jadi pemandangan anu hésé urang meunangkeun di kota. Komo deui upama panon poé mimiti  leungit di kulon, leungit diantara Gunung Salak 1 jeung Gunung Salak 2, kaéndahan ciptaan Pangéran anu moal bisa digambarkeun ku kekecapan, iwal kecap Subhanallah.